Дзмітрыя Аляксандравіча Малашанку затрымалі супрацоўнікі Упраўлення КДБ па Гомельскай вобласці 30 верасня 2021 года, на другі дзень пасля таго, як ён пакінуў каментар пад пастом з відэа затрымання і забойства IT-спецыяліста Андрэя Зэльцэра у пабліку “Моцныя навіны” у сацыяльнай сетцы “ВКонтакте”.

Пра Малашанку вядома, што ён удзельнічаў у велапрабегу ў падтрымку Лукашэнкі і прымаў удзел у якасці дружынніка ў свой выходны дзень на выбарах у 2020 годзе. А яшчэ мужчына ў судзе шчыра не разумеў за што яго судзяць. Яго абвінавацілі ў дыскрэдытацыі Рэспублікі Беларусь (арт. 369-1 Крымінальнага кодэкса).

Пад суд Дзмітрый Малашанка трапіў за два каментары “У краіне страшней, чым у Самалі” і “Калі б была ў мяне стрэльба і да мяне ламаліся б такія людзі, я б таксама абараняў свой дом, толькі б барыкады зрабіў”.

Суд Чыгуначнага раёна Гомеля 26 кастрычніка 2022 года вынес прысуд. Суд прызнаў Дзмітрыя Малашанку вінаватым і пакараў пазбаўленнем волі тэрмінам на два гады і штрафам у памеры 100 базавых велічыняў з канфіскацыяй тэлефона. Судовы працэс вёў суддзя Яўген Шаршнёў, дзяржабвінаваўца – пракурор Канстанцін Шапачкін. 

Па падліках праваабаронцаў мусіў выйсці на волю ў кастрычніку 2023 г. 

Гомельскага грузчыка асудзілі на два гады калоніі па "справе Зэльцэра"

Суд Чыгуначнага раёна Гомеля 26 кастрычніка вынес прысуд грузчыку Гомельскага вінзавода Дзмітрыю Малашанку, абвінаваціўшы яго ў дыскрэдытацыі Рэспублікі Беларусь (арт. 369-1 Крымінальнага кодэкса).