Дзяніс Пятровіч Краўчук — актывіст, дальнабойнік. Дзяніс быў затрыманы 26 красавіка 2021 года ў межах крымінальнай справы аб замове з мэтай захопу дзяржаўнай улады (арт. 357 Крымінальнага кодэксу) і змешчаны ў СІЗА-1.

На пачатку чэрвеня 2022 года КДБ скончыў папярэдняе расследаванне крымінальнай справы. Тады стала вядома, што Дзяніса Краўчука канчаткова вінавацяць па іншым артыкуле Крымінальнага кодэксу — 342 (Групавыя дзеянні, якія груба парушаюць грамадскі парадак).

9 чэрвеня 2022 г. Генпракуратура паведаміла, што справу "аб змове з мэтай захопу дзяржаўнай улады" накіравалі ў суд. Разгляд справы пачнецца 29 ліпеня ў Мінскім раённым судзе ў закрытым рэжыме.

Разгляд справы пачаўся 29 ліпеня 2022 года ў Мінскім раённым судзе. У другі дзень пасяджэння Дзяніс прызнаў сваю віну. 30 жніўня дзяржаўны абвінаваўца Міхаіл Кавалёў запатрабаваў для палітвязня 3 гады зняволення. 5 верасня суддзя Уладзімір Арэшка прызнаў Дзяніса вінаватым і прысудзіў яму 2,5 гады зняволення ў калоніі ва ўмовах агульнага рэжыму. 29 лістапада Вярхоўны суд пакінуў прысуд палітвязню ў сіле.

9 снежня 2022 г. МУС дадала палітвязня ў Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці.

На пачатку снежня Дзяніса этапавалі ў шклоўскую ПК № 17, дзе ён 22 дні правёў у ШІЗА.

Палітвязень цалкам адбыў тэрмін і 6 студзеня 2023 г. выйшаў на волю.

Да 11 гадоў калоніі. Вынесены прысуды па "справе змоўшчыкаў"

Дзяніс Краўчук яшчэ раз заявіў аб сваім раскаянні ў зробленым і папрасіў суд не прызначаць яму пакаранне, звязанае з пазбаўленнем волі, а пры вынясенні прысуду ўлічыць яго раскаянне.

Ад 3 да 12 гадоў калоніі — пракурор запрасіў тэрміны па "справе змоўшчыкаў"

"Аператыўны эксперымент дазволіў не дапусціць ваеннага перавароту і кровапраліцця", — падкрэсліў дзяржаўны абвінаваўца, выступаючы ў спрэчках. На думку пракурора, два фігуранты справы — Дзяніс Краўчук і Вольга Галубовіч — не бралі ўдзелу ў змове, накіраванай на захоп улады неканстытуцыйным шляхам.

Падтрымліваў дзяржабвінавачванне па справах "37", палітвязня Урада: што вядома пра пракурора па "справе змоўшчыкаў"

Судовы працэс у адкрытым рэжыме вядзе суддзя Уладзімір Арэшка, дзяржабвінавачванне падтрымлівае Міхаіл Кавалёў. "Вясна" распавядае, што вядома пра пракурора па гэтай гучнай справе.

Суд па "справе змоўшчыкаў": пад канвоем дапытваюць палітзняволеных прафсаюзнікаў

У суд пад канвоем дастаўлены кіраўнік Беларускага кангрэса дэмакратычных прафсаюзаў (БКДП) Аляксандр Ярашук. У судзе ён даваў паказанні ў якасці сведкі, пытанні задаваў яму дзяржаўны абвінаваўца. Ярашук распавёў, што знаёмы з шэрагам абвінавачаных па гэтай справе, з асноўным фігурантам справы Юрыем Зянковічам — з 2000-х гадоў. Ярашук паведаміў суду, што сустракаўся з Зянковічам у жніўні 2020 года, той прыходзіў да яго ў офіс у Мінску. Аляксандр даў паказанні аб тым, што Зянковіч разглядаў варыянт змены ўлады неканстытуцыйным шляхам.

Суд па "справе змоўшчыкаў": Зянковіч прызнаў віну і папрасіў прабачэння ў астатніх фігурантаў

8 жніўня Юры Зянковіч прызнаў сваю віну цалкам і не адмаўляў, што з'яўляўся арганізатарам змовы. Таксама ён папрасіў прабачэння ў саўдзельнікаў. Раней стала вядома, што Зянковіч — адзіны з абвінавачаных па гэтай справе, які заключыў здзелку са следствам. Як удакладніў дзяржабвінаваўца падчас судовага пасяджэння па справе аб спробе дзяржаўнага перавароту, Зянковіч даў чыстасардэчнае прызнанне, заявіў, што абавязваецца дапамагаць у расследаванні і выкрыць удзельнікаў злачынства.

Тыдзень суда па "справе змоўшчыкаў": падрабязнасці той самай сустрэчы ў рэстаране Зянковіча і "сілавіка"

Прагляд відэа пачаўся з таго, як абвінавачаны Зянкевіч сустракаецца ў рэстаране з "сілавіком" Аляксеем Жураўскім і абмяркоўвае пытанні, звязаныя са спробай змены ўлады неканстытуцыйным шляхам. У судзе таксама быў агалошаны дыялог Зянковіча і Жураўскага. Тады Зянковіч сказаў, што змоўшчыкам патрэбен "які-небудзь генерал" і параіў Жураўскі "падысці (да генерала) і падаруначак прынесці".

Пяты дзень суду па "справе змоўшчыкаў": допыт сведкаў

Абвінавачаны Краўчук у судзе заявіў, што пазнаў сведку — ён з ім сустракаўся пару разоў у верасні 2020 года, атрымаў грошы ў памеры двух тысяч даляраў, пасля чаго адвёз іх на вакзал і паклаў у ячэйку камеры захоўвання.

Чацвёрты дзень суду па "справе змоўшчыкаў": азнаямленне з матэрыяламі справы

Сёння ідзе допыт Дзяніса Краўчука, які па гэтай справы праходзіць як удзельнік пратэстаў 2020 года. Ён, як і яшчэ адна абвінавачаная Вольга Галубовіч, даюць паказанні пра тое, як атрымлівалі ад Зянковіча грошы і хавалі ў розных месцах. У судзе Краўчук распавёў, што пазнаёміўся з Зянковічам жніўні 2020 года на пратэстах у Мядзелі, сам да яго падышоў, таму што раней чытаў, што ў Зянковіча былі прэзідэнцкія амбіцыі.

Трэці дзень суду па "справе змоўшчыкаў": Фядута і Галубовіч даюць паказанні

На судзе зачыталі ўсім абвінавачванні. Фядута прызнаў віну часткова, а Кастусёў і Зянковіч — не прызналі, Краўчук і Галубовіч — прызналі віну цалкам. "Вясна" сочыць за судовым працэсам і распавядае, як праходзіць рэзанансны суд.

Другі дзень суду па "справе змоўшчыкаў": Рыгор Кастусёў віну не прызнаў

Кастусёў віну не прызнаў, Галубовіч і Краўчук прызналі ў поўным аб'ёме.

Сёння пачаўся суд па справе аб "захопе ўлады"

Суд праходзіць у будынку Мінскага раённага суда. Судовы працэс вядзе суддзя Уладзімір Арэшка. Раней КДБ паведамляў, што па гэтай крымінальнай справе аб "захопе ўлады" праходзяць дзевяць чалавек, але пад вартай знаходзяцца толькі пяцёра — астатнія за мяжой.