Дзмітрый Алегавіч Жунусаў нарадзіўся ў 1990 годзе ў Пінску. Пражыў шмат гадоў ва Украіне, у 2019 годзе ажаніўся там на ўкраінцы. У сям'і нарадзілася дачка. Дзмітрый у беларускім войску не служыў, а ва Украіне яго ўзялі ва УСУ, у службу забеспячэння. Так мужчына апынуўся ў зоне размежавання як вартаўнік, у яго задачы ўваходзіла ахова ваеннага склада. Там ён прапрацаваў з сакавіка па кастрычнік 2021, на стыку паміж самаабвешчанымі ДНР/ЛНР і падкантрольнай Украіне тэрыторыі.

Калі Дзмітрый страціў беларускі пашпарт, ён звярнуўся ў беларускую амбасаду ў Кіеве, дзе яму выдалі часовы дакумент наўзамен пашпарта. У пасольстве таксама параілі прыехаць па паўнавартасны пашпарт у РБ, і Дзмітрый у кастрычніку 2021 года вярнуўся на радзіму.

Адразу пасля перасячэння мяжы Жунусава затрымалі. Двое сутак без перапынку яго дапытвала КДБ на тэму "тэрарызму" і "перавозкі зброі" з Украіны ў Беларусь.

Ніякіх падобных фактаў не знайшлося, але 25.10.2021 мужчыну з Брэсцкага ІЧУ перавялі ў Брэсцкае СІЗА. І абвінавацілі ў "найміцтве" (ч.1 арт. 361-3 КК РБ).

У сакавіку 2022 года Брэсцкі аблсуд у асобе суддзі Русланы Сянько разгледзеў справу ў дачыненні да Дзмітрыя. За службу ва ўкраінскім войску пракурорка Таццяна Цыбуля запрасіла для Жунусава два гады і шэсць месяцаў калоніі агульнага рэжыму. 17 сакавіка 2022 года суддзя менавіта такое пакаранне і прызначыла.

Адбывае пакаранне ў папраўчай калоніі № 22.