Даніла Андрэевіч Ганчароў — мастак па святле, быў звольнены з Новага драматычнага тэатра за забастоўку.

Міліцыянты прыйшлі ў кватэру Данілы з вобшукам 15 сакавіка 2021 г. і затрымалі за “адзіночнае пікетаванне”, адшукаўшы сцяг, на 15 сутак. 30 сакавіка ён мусіў выйсці на волю, але 26-га Ганчарова прывезлі з Жодзіна ў Мінск на допыт, адправілі спачатку ў ІЧУ на Акрэсціна, потым перавялі ў СІЗА на Валадарскага.

Суд Цэнтральнага раёна 9 ліпеня 2021 г. вынес прысуд Данілу Ганчарову, якога вінавацілі ва ўдзеле ў групавых дзеяннях, што груба парушаюць грамадскі парадак (ч. 1 арт. 342 КК), і саўдзеле ў такім злачынстве (ч. 6 арт. 16 ч. 1 арт. 342 КК).

Суддзя Дзмітры Карсюк, нягледзячы на сумнеўнасць доказаў і відавочныя памылкі ў матэрыялах справы, палічыў, што віна палітвязня даказаная і пакараў яго двума гадамі калоніі агульнага рэжыму. Менавіта такі тэрмін запрасіў пракурор Цімафей Нічыпарук. 

Даніла Ганчароў у судзе сваёй віны не прызнаў і адмовіўся ад дачы паказанняў.

Палітвязень цалкам адбыў тэрмін і 25 снежня 2022 г. выйшаў на волю з ПК № 17.

"Калонія на час няволі — гэта дом. І ў гэтым доме няма ніводнага кутка, дзе ты гаспадар", — экс-палітвязень Даніла Ганчароў

30-гадовага мастака па асвятленні Данілу Ганчарова асудзілі па “народным” артыкуле ў 2021 годзе. За два гады няволі ў ПК № 17 мужчына даведаўся пра розныя рэжымы калоніі і адчуў на сабе стаўленне адміністрацыі да палітычных зняволеных, убачыў, што такое сапраўдны абсурд і навучыўся яднацца вакол творчасці ў няволі. Засвоіў прафесію краўца і даказаў іншым вязням, што палітычныя не “ср*ная інтэлегенцыя”. Пра гэта і іншае былы палітвязень распавёў "Вясне".

«Псіхолагі» там добрыя: проста бʼюць, пакуль жыць не захочаш». Размова з былым палітвязнем

Яшчэ тры тыдні таму ён насіў жоўтую бірку «экстрэміста», маляваў для вязняў партрэты жанчын і трапляў у ШІЗА шклоўскай калоніі № 17. Сёння – шпацыруе з намі па набярэжнай Віслы ў Варшаве. Былога палітвязня і мастака-асвятляльніка Данілу Ганчарова вызвалілі на каталіцкія Каляды. І ў першыя тыдні на свабодзе ён адчуў расчараванне.

Для Данілы Ганчарова запрасілі два гады пазбаўлення волі за ўдзел у шасці нядзельных маршах і перасылку інфармацыі ў Telegram

Даніла Ганчароў выступіў з апошнім словам: "Вось маё стаўленне да абвінавачвання: каб ўспрымаць яго сур’ёзна, прызнаваць маю віну, мне хацелася б бачыць яго акуратна створаным, каб хаця б нейкая павага да чалавека была праяўленая гэтым тэкстам”.