Даніла Андрэевіч Чамаданаў – фігурант берасцейскай "справы карагодаў", узбуджанай па падзеях 13 верасня 2020 года ў горадзе (калі пратэстоўцы выйшлі на праезную частку, а іх разагнаў вадамёт). Даніла - грамадзянін Расіі. 

Прад'яўлена абвінавачванне па арт. 342 Крымінальнага кодэкса (Актыўны ўдзел у групавых дзеяннях, якія груба парушаюць грамадскі парадак). 

У судзе Маскоўскага раёна Брэста 7 траўня 2021 года асудзілі яшчэ 14 фігурантаў па "справе карагодаў", у тым ліку і Данілу Чамаданава. Яму прысудзілі 1 год пазбаўлення волі ў папраўчай калоніі агульнага рэжыму.

23 кастрычніка 2021 года Даніла Чамаданаў адбыў тэрмін пакарання і выйшаў на волю з ПК №2, аднак адразу быў дэпартаваны ў Расію. Цяпер яму нельга ўязджаць у Беларусь на працягу двух гадоў. Да гэтага 24-гадовы хлопец 22 гады пражыў у Беларусі.

Да года калоніі. Па брэсцкай "справе карагодаў" пакаралі яшчэ 14 чалавек

У судзе Маскоўскага раёна Брэста 7 траўня асудзілі яшчэ 14 фігурантаў па "справе карагодаў" па ч. 1 арт. 342 Крымінальнага кодэкса за ўдзел 13 верасня ў карагодзе на скрыжаванні бульвара Касманаўтаў і праспекта Машэрава, калі пратэстоўцы былі разагнаныя вадамётам. Суддзя Іна Клышпач прызнала ўсіх вінаватымі і прызначыла пакаранне ад 1,5 года "хатняй хіміі" да 1 года калоніі. Колькасць абвінавачаных па "справе карагодаў" ўжо больш за 70 чалавек — гэта адна з самых масавых "палітычных справаў" у Беларусі. Брэсцкія суды асудзілі па гэтай справе ўжо 32 чалавекі.