Ціхан Антонавіч Шлюхціц — тэхнік-электрык з Гродна. Яго затрымалі 13 верасня 2021 года ў межах крымінальнай справы паводле ч. 1 арт. 342 КК (Арганізацыя або актыўны ўдзел у групавых дзеяннях, якія груба парушаюць грамадскі парадак). 

Згодна з абвінавачваннем, 6 верасня 2020 года, Ціхан пакінуў у тэлеграм-чаце "Гродна для жыцця” сем каментароў, “выказваючы нецярпімасць да існуючага палітычнага рэжыму і канстытуцыйнага ладу з мэтай арганізацыі на тэрыторыі горада Гродна групавых дзеянняў, якія груба парушаюць грамадскі парадак, спалучаных з відавочным непадпарадкаваннем законным патрабаванням прадстаўнікоў улады, накіраваных на парушэнне працы транспарту".

Суд пакараў яго пазбаўленнем волі тэрмінам на 1 год і 3 месяцы ў калоніі агульнага рэжыму.

На пачатку сакавіка 2022 г. Ціхан быў пераведзены з Турмы № 1 у бабруйскую ПК № 2.

Паводле інфармацыі праваабаронцаў, у выніку палітвязню прызначылі пакаранне ў выглядзе двух з паловай гадоў зняволення ў калоніі ва ўмовах агульнага рэжыму. Прычыны павелічэння тэрміну невядомыя.

"Пакінуў у чаце сем каментароў": прысуд — год і 3 месяцы калоніі

Суд Кастрычніцкага раёна Гродна 14 снежня разгледзеў крымінальную справу ў дачыненні да 27-гадовага тэхніка-электрыка Ціхана Шлюхціца. Яго абвінавацілі па ч. 1 артыкула 342 КК (арганізацыя або актыўны ўдзел у групавых дзеяннях, якія груба парушаюць грамадскі парадак). Справу разглядала суддзя Маргарыта Ланцэвіч, дзяржаўнае абвінавачванне падтрымліваў памочнік пракурора Гродна Ігар Якімовіч.