Арцём Сяргеевіч Задруцкі быў затрыманы ў Брэсце па крымінальнай справе, распачатай за каментары ў інтэрнэце пасля гібелі супрацоўніка КДБ Дзмітрыя Федасюка і it-спецыяліста Андрэя Зельцэра. Вядома, што Арцём праходзіў па крымінальнай справе паводле арт. 369 КК (Абраза прадстаўніка ўлады), арт. 130 КК (Распальванне сацыяльнай варожасці) і арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх).

Да затрымання працаваў гукарэжысёрам, але ў зняволенні ў яго здарылася запаленне вуха: праз несвоечасовае лячэнне мужчына страціў слых на адно вуха.

Арцём піша вершы і малюе.

Напрыканцы снежня 2022 г. палітвязня перавялі з СТ № 8 у мінскі СІЗА-1.

Паводле інфармацыі праваабаронцаў, адбыўся разгляд справы, у выніку якога суддзя Мінскага гарадскога суда Вера Галаўкова прызнала Арцёма вінаватым і асудзіла яго да трох гадоў зняволення ў калоніі ва ўмовах агульнага рэжыму. Таксама мужчына мусіць выплаціць 100 базавых велічыняў кампенсацыі маральнай шкоды.

24 сакавіка 2023 г. у Вярхоўным судзе разгледзелі апеляцыю на прысуд.

Палітзняволенага этапавалі ў наваполацкую ПК № 1 у канцы сакавіка 2023 г.

21 красавіка 2023 г. МУС унесла палітвязня ў "спіс экстрэмістаў".

У калоніі ў Арцёма з'явіліся праблемы са здароўем — з нервам твару, а таксама ў жніўні 2023 г. яго збіраюцца змясціць у ШІЗА.

Выйшаў на волю 30 снежня 2023 г. 

"Пра гэта казаць цяжка, але людзі забываюць", — палітвязень па "справе Зельцэра" ў гадавіну затрымання

"Справа Зельцэра" — адна з самых гучных і масавых палітычных справаў Беларусі. 28 верасня 2021 года ў перастрэлцы ў мінскай кватэры загінулі IT-спецыяліст Андрэй Зельцэр і супрацоўнік КДБ Дзмітрый Федасюк. Гэтая беспрэцэдэнтная падзея выклікала ў беларусаў буру эмоцый. За каментары з асуджэннем дзеянняў кдбшнікаў паводле крымінальных справаў асудзілі не менш за 124 чалавекі. Абсалютная большасць з іх была пазбаўлена волі. Амаль усе адбылі свае тэрміны цалкам у нечалавечых умовах і выйшлі на волю па заканчэнні тэрміну. Сярод іх — 38-гадовы творчы дзеяч Арцём Задруцкі. Публікуем яго маналог у гадавіну "справы Зельцэра".

Творчы работнік Арцём Задруцкі: гісторыя аднаго палітвязня

Палітзняволенага Арцёма Задруцкага асудзілі да трох гадоў калоніі па “справе Зельцэра” за адзін каментар. За час зняволення мужчыну не аказвалі дапамогу з праблемамі з вухам — і былы гукарэжысёр аглух на яго. Аднак гэта не зламала мужчыну: ён працягвае змагацца за свае правы нават у СІЗА, малюе партрэты і піша вершы — у ягонай скарбонцы ўжо больш за 150 твораў.