Арцём Мядзведскі — фігурант крымінальнай справы, узбуджанай пасля акцый пратэсту ў жніўні ў Мінску.

Спачатку яму прад'явілі абвінавачванне па артыкуле аб удзеле ў масавых беспарадках (ч. 2 арт. 293 Крымінальнага кодэксу), затым справу перакваліфікавалі на арт. 342 КК (Групавыя дзеянні, якія груба парушаюць грамадскі парадак).

Затрыманы 19 кастрычніка 2020 года на працы. Падстава — Арцёма пазналі па відэа з пратэстаў каля ГЦ "Рыга".

Знаходзіўся пад вартай у СІЗА-1 у Мінску да суда.

12 студзеня 2021 года пачаўся разгляд яго справы. 15 студзеня быў агучаны прысуд: 3 гады абмежавання волі з накіраваннем у папраўчую ўстанову ("хімія"). Мядзведскага вызвалілі ў зале суда. Пакаранне набудзе сілу ў выпадку, калі прысуд не будзе зменены вышэйшай інстанцыяй.

20 красавіка 2021 Арцём Мядзведскі паехаў адбываць пакаранне ў Папраўчую ўстанову адкрытага тыпу №45.

На пачатку лютага 2022 стала вядома, што Арцём уцёк з "хіміі". Паведамляецца, што Мядзведскі збег з лякарні ў Камянцы, куды трапіў з лёгкім страсеннем мазгоў пасля таго, як паслізнуўся і зваліўся ў будынку ПУАТ.

У сярэдзіне красавіка 2022 з'явілася інфармацыя аб тым, што Арцём затрыманы і ізноў утрымліваецца ў няволі. 21 красавіка 2022 года ў судзе Камянецкага раёна разглядзелі справу «аб пераводзе ў папраўчую ўстанову іншага тыпу і змене ўмоваў рэжыму». Суддзя Аксана Шкель пастанавіла змясціць Мядзведскага ў калонію тэрмінам на 9 месяцаў.

На пачатку траўня 2022 г. Арцёма перавялі з ПУАТ № 45 у брэсцкі СІЗА-7, а на пачатку чэрвеня этапавалі ў івацэвіцкую калонію № 22.

Выкаціў валун на дарогу. У Мінску пачалі судзіць палітвязня Арцёма Мядзведскага

У судах працягваецца разгляд крымінальных спраў, узбуджаных у сувязі з масавымі пратэстамі ў жніўні супраць фальсіфікацыі вынікаў прэзідэнцкіх выбараў. 12 студзеня ў судзе Ленінскага раёна Мінска пачаўся разгляд крымінальнай справы, узбуджанай першапачаткова па «масавых беспарадках» (арт. 293 КК), але да суду перакваліфікаванага па артыкуле аб дзеяннях, якія груба парушаюць грамадскі парадак (арт. 342 КК). Вядзе працэс суддзя Таццяна Шоцік. Дзяржаўнае абвінавачванне падтрымлівае Святаслаў Вялікі. На лаве падсудных 23-гадовы кухар-сушыст Арцём Мядзведскі. Ён быў прызнаны палітычным зняволеным.

Пракурор запрасіў для палітвязня Арцёма Мядзведскага тры гады "хіміі"

У судзе Ленінскага раёна Мінска ў сераду, 13 студзеня, працягнуўся разгляд крымінальнай справы палітычнага вязня Арцёма Мядзведскага. Ён абвінавачваецца па артыкуле аб дзеяннях, якія груба парушаюць грамадскі парадак (арт. 342 КК РБ).

 

 

Палітвязня Мядзведскага асудзілі на тры гады "хіміі" і вызвалілі ў зале суда

У судзе Ленінскага раёна Мінска ў 15 студзеня суддзя Таццяна Шоцік агучыла прысуд па крымінальнай справе палітычнага вязня Арцёма Мядзведскага, якога абвінавацілі ў здзяйсненні дзеянняў, што груба парушаюць грамадскі парадак (арт. 342 КК РБ). Мядзведскага прызналі вінаватым па гэтым артыкуле і прысудзілі да трох гадоў абмежавання волі з накіраваннем ў папраўчую ўстанову адкрытага тыпу ("хімія"). Менавіта столькі і прасіў на папярэднім пасяджэнні пракурор.