Арцём Анішчук
Былы палітвязень
Дата нараджэння: 20 чэрвеня 1988
Дата затрымання: 29 верасня 2020
Прад'яўленыя абвінавачванні:
ч. 2 арт. 339 Крымінальнага кодэкса — Хуліганства, здзейсненае групай асобаў
арт. 369 Крымінальнага кодэкса — Абраза прадстаўніка ўлады
арт. 411 Крымінальнага кодэкса — Злоснае непадпарадкаванне патрабаванням адміністрацыі папраўчай установы
Вынік суда: 3 гады
Від пакарання: пазбаўленне волі ў калоніі ва ўмовах агульнага рэжыму
Дата вызвалення: 18 траўня 2023
Суддзя: Шаўцоў Віктар, Нікіфарава Ксенія
![](https://spring96.org/files/images/arcjom_aniszczuk_fota_z_sacsetak_logo.jpg)
Арцём Ігаравіч Анішчук — фігурант справы аб пашкоджанні аўтамабіля Аляксандра Гейца — намесніка начальніка аддзела арганізацыі аператыўна-рэжымнай працы Дэпартамента выканання пакаранняў.
Суд Мінскага раёна 3 лютага 2021 вынес прысуды па крымінальнай справе супраць пецярых мінчукоў, затрыманых 29 верасня у Баравой. Іх абвінавачвалі паводле ч. 2 арт. 339 Крымінальнага кодэкса (злоснае хуліганства). Матэрыяльная шкода машыны склала 5 222 рублёў 88 капеек. Суддзя Віктар Шаўцоў пакараў Арцёма двума гадамі калоніі.
Арцём заяўляў пра катаванні і збіццё ў магілёўскай ПК-15, супраць яго заводзілі крымінальную справу паводле арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы). Арцёма ў верасні перавялі ў бабруйскую калонію №2. Таксама стала вядома, што супраць яго ўзбудзілі крымінальную справу па арт. 369 Крымінальнага кодэкса — за абразу міліцыянта ў закрытым тэлеграм-чаце да яго затрымання. Па гэтым факце як сведку дапытвалі яшчэ аднаго фігуранта справы «пяцёркі» Паўла Сахарчука.
Арцёма ўтрымлівалі 40 сутак запар у ШІЗА, дзе на яго накінуўся зняволены з псіхічнымі захворваннямі і падрапаў яму станком спіну.
Як стала вядома праваабаронцам у верасні 2021 года, распачатая ў калоніі справа за "злоснае непадпарадкаванне патрабаванням адміністрацыі папраўчай установы" павінна быць спыненая, бо пракуратура прызнала незаконным пакаранне ў выглядзе ПКТ у дачыненні да Анішчука, аднак справа дагэтуль не закрытая. Праваабаронцам вядома, што на Арцёма ў калоніі аказваецца ціск.
Арцём мусіў выйсці на свабоду, адбыўшы цалкам тэрмін у два гады, 29 чэрвеня 2022 г. Але яго перавялі з калоніі ў следчую турму № 4 для "правядзення следчых дзеянняў" і ўзялі пад варту па новай крымінальнай справе паводле арт. 369 Крымінальнага кодэкса. 25 ліпеня 2022 г. у судзе Ленінскага раёна Магілёва суддзя Ксенія Нікіфарава склала прысуды па двух крымінальных справах (нават па той, па якой ён цалкам адбыў тэрмін) і прызначыла палітвязню ў суме тры гады калоніі, два з якіх ён адбыў. Арцём на судзе віну не прызнаў і заявіў, што новая крымінальная справа — гэта помста начальніка калоніі № 15, дзе ён зазнаваў катаванні і збіццё. У выніку палітвязню засталося адбываць яшчэ каля года зняволення.
У Магілёўскім абласным судзе 22 верасня 2022 г. разглядзелі апеляцыйную скаргу палітзняволенага. Суддзя Сяргей Каралёў пакінуў прысуд без зменаў. Неўзабаве палітвязня перавялі з турмы № 4 у СІЗА-3, а на пачатку кастрычніка — у бабруйскую ПК № 2.
У кастрычніку МУС уключыў палітвязня ў спіс "асобаў, датычных да экстрэмісцкай дзейнасці".
18 траўня 2023 г. палітзняволены выйшаў на волю, цалкам адбыўшы тэрмін.
![]()
Палітвязня Арцёма Анішчука асудзілі па новай крымінальнай справе яшчэ на год калоніі
![]()
Арцёма Анішчука не выпусцілі на волю — яго ўзялі пад варту па новай справе
![]()
Супраць Арцёма Анішчука ўзбудзілі новую крымінальную справу і этапавалі ў магілёўскую турму
![]()
ШІЗА і правакатар: ціск на Арцёма Анішчука ў калоніі працягваецца
![]()
Арцём Анішчук у магілёўскай калоніі праглынуў металічныя прадметы, каб яго спынілі катаваць
![]()
Жонка зняволенага Арцёма Анішчука: Пасля пракурорскай праверкі мужа збіваў начальнік калоніі
![]()
"Будзеш сядзець ад званка да званка". Катаванні, бясконцыя ШІЗА, ціск: што вядома пра асуджаных па "справе пяцёркі"
![]()
Да 6 гадоў калоніі ўзмоцненага рэжыму. Суд вынес прысуды пяці мінчукам, якія пашкодзілі машыну жонкі міліцыянта