Мінчук Антон Валавік быў затрыманы ў сябе дома 21 ліпеня ў рамках крымінальных справаў за падзеі 14 ліпеня. Увечары 14 ліпеня ў Мінску і іншых гарадах краіны прайшлі стыхійныя акцыі пратэсту супраць нерэгістрацыі кандыдатамі ў прэзідэнты Віктара Бабарыкі і Валерыя Цапкалы. У сталіцы ў той вечар было затрымана каля 300 чалавек, многія з іх былі аштрафаваныя і адпраўлены на "суткі" па артыкулах 23.34 і 23.4 КаАП. Акрамя таго, за падзеі 14 ліпеня ў Мінску былі распачатыя крымінальныя справы – у тым ліку, на Антона Валавіка.

Антона Валавіка абвінавацілі ў тым, што ўвечары 14 ліпеня ён браў удзел у несанкцыянаваным масавым мерапрыемстве і меў намер публічнага пратэсту і здзяйснення дэструктыўнай дзейнасці. Ён далучыўся да групы грамадзян, стаяў у першых шэрагах счэпкі, выкрыкваў лозунгі, а таксама нанёс удары правай нагой супрацоўнікам АМАП: Самалётаву — па руцэ, Астапуку — па галаве.

Антон Валавік прызнаў віну па 342 артыкулу і не прызнаў — па 364. Ён распавеў, што ў той вечар выехаў з сябрамі ў горад. Каля дома-з'езду РСДРП убачыў натоўп, а на тратуары — чалавека, які ляжаў і крычаў. Антон Валавік сказаў, што вырашыў дапамагчы, бо "няправільна біць ляжачага". 

Яго прызналі вінаватым і 1 лютага 2021 года прызначылі тры гады пазбаўлення волі ў калоніі агульнага рэжыму па сукупнасці двух артыкулаў. Адзін год  — паводле 342 артыкула і тры гады — паводле 364 артыкула. 

4 сакавіка 2023 г. палітзняволены выйшаў на волю, цалкам адбыўшы тэрмін.

Мінск: Антону Валавіку прысудзілі тры гады пазбаўлення волі

Справу разглядзела суддзя Вольга Няборская, дзяржабвінавачанне прадставіў пракурор Арцём Яўтуховіч.

Мінск: пачаўся суд над Антонам Валавіком па падзеях 14 ліпеня

Антон Валавік прызнае віну па 342 артыкулу і не прызнае — па 364.