Антон Андрэевіч Кошчанка з Калінкавічаў 9 сакавіка 2022 года асуджаны на два гады і шэсць месяцаў пазбаўлення волі ў межах крымінальнай справы аб групавых дзеяннях, якія груба парушаюць грамадскі парадак (арт. 342 Крымінальнага кодэксу).

Згодна з абвінавачваннем, ён распрацаваў і змясціў на абмеркаванне ў тэлеграм-канал «Мозырь 97%» план Палескага шляху-2020 на ўзор Балтыйскага шляху 1989 года. У ім людзі меліся стаць жывым ланцугом спачатку ад Мазыра да Калінкавічаў, а пазней маглі далучацца і жыхары іншых гарадоў і вёсак. Гэты план ён нібыта абмяркоўваў з нейкім чалавекам, з якім сустракаўся некалькі разоў у Мазыры. Але такой падзеі ў 2020 годзе ў мазырска-калінкавіцкім рэгіёне не адбывалася.

Таксама нібыта ён у жніўні 2020 года ў тэлеграм-каналах пры абмеркаванні прапанаваў блакаваць райвыканкам, РАУС, пракуратуру і Следчы камітэт і патрабаваць ад іх выканання заканадаўства, нібыта заклікаў выкарыстоўваць кактэйлі Молатава. Таксама ў абвінавачванні шмат іншых эпізодаў, з якіх падаецца, што Антон Кошчанка арганізаваў усю пратэсную актыўнасць у Мазыры.

Антон адбывае пакаранне ў ПК № 3.

Выйшаў на волю 26 студзеня 2024 г. 

Мужчыну асудзілі да 2,5 гадоў калоніі за арганізацыю жывога ланцуга, якога не было

9 сакавіка 2022 года ў Мазыры да 2,5 гадоў пазбаўлення волі ў калоніі агульнага рэжыму асудзілі Антона Кошчанку. Яго прызналі вінаватым паводле арт. 342 Крымінальнага кодэкса. Менавіта такое пакаранне запрасіў прадстаўнік пракуратуры Ярмоленка. Прысуд вынесла суддзя Валянціна Новікава.