Антаніна Кавалёва

сябра Аб'яднанай грамадзянскай партыі

Дата нараджэння: 12 красавіка 1959

Дата затрымання: 27 ліпеня 2022

Прад'яўленыя абвінавачванні:

арт. 342 Крымінальнага кодэкса — Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх

Вынік суда: 1 год

Від пакарання: пазбаўленне волі ў калоніі ва ўмовах агульнага рэжыму

Дата пачатку адбыцця пакарання: 16 лютага 2023

Дата вызвалення: 22 красавіка 2023

Суддзя: Кулік Анастасія

Пракурор: Зубко Іна

Сімвалічны/ая хросны/ая: Веранік Гільятэн, сябра Сената Францыі

Антаніна Кліменцьеўна Кавалёва — юрыстка, скончыла Беларускі дзяржаўны ўніверсітэт. Мае досвед працы юрысконсульта, натарыуса, галоўнага спецыяліста Міністэрства юстыцыі. У Аб'яднанай грамадзянскай партыі з 2002 года. Працавала ў выканкаме АГП, два гады ўзначальвала Камісію па прававых пытаннях Нацыянальнага камітэта АГП. У 2012 годзе была абраная намесніцай старшыні Аб'яднанай грамадзянскай партыі. Потым сышла з гэтай пасады. Была затрыманая разам з іншымі лідарамі партыі 27 ліпеня 2022 года. 

"Заўсёды лічыла сябе хутчэй дысідэнтам, чым палітыкам, паколькі для мяне маральная, маральная пазіцыя і прынцыпы важнейшыя за палітычную мэтазгоднасць. Аб'яднаная грамадзянская партыя ставіць інтарэсы чалавека, яго правы і свабоды вышэй за інтарэсы дзяржавы. Гэта запісана ў статуце партыі і абвяшчаецца адной з базавых каштоўнасцяў у Стратэгічным плане АГП на 2012-2016 гады, прынятым XIV з'ездам партыі. Гэта супадае з маёй пазіцыяй грамадзяніна, юрыста, праваабаронцы. АГП — мая каманда", — казала яна пасля прызначэння намеснікам старшыні АГП.

Працэс над сябрамі АГП пачаўся 1 лістапада 2022 г. у судзе Першамайскага раёна Мінска. 3 лістапада суддзя Анастасія Кулік прысудзіла палітзняволенай адзін год пазбаўлення волі ў калоніі ва ўмовах агульнага рэжыму. Неўзабаве Антаніну перавялі з СІЗА-1 у гомельскі СІЗА-3.

31 студзеня 2023 г. у Мінгарсудзе разглядзелі апеляцыйную скаргу лідараў АГП. Суддзя Жанна Брысіна пакінула прысуд без зменаў, а скаргу без задавальнення.

Антаніну ў сярэдзіне лютага 2023 г. этапавалі з СІЗА-3 у гомельскую калонію № 4, атрад № 7.

Палітзняволеная цалкам адбыла пакаранне і выйшла на волю 22 красавіка 2023 г.

Да двух з паловай гадоў калоніі: вынесены прысуды палітзняволеным лідарам АГП

2 лістапада палітзняволеныя, у тым ліку Антаніна Кавалёва, выступілі з апошнім словам: "Хацела прынесці карысць грамадству, а зараз прапануецца расцэньваць гэта дрэнна. Знаходжанне ў турме — гэта бяда. Гэта бяда для любога чалавека. Там знайшлі лісты, якія я пісала зняволеным і іх адказы. Гэтыя людзі не ўсе мае знаёмыя, але я разумела, што турма — гэта бяда. Што людзі ў няшчасці знаходзяцца і мне хацелася неяк ім дапамагчы, неяк падтрымаць. Сярод усіх народаў, і сярод славянскіх народаў, прынята традыцыя дапамогі зняволеным. І я лічу, што мяне павінна гэта характарызаваць станоўча, а не разглядацца як доказ маёй віны".

"Я прызнаю сябе больш пацярпелым, чым вінаватым". У Мінску судзяць лідараў Аб’яднанай грамадзянскай партыі

Падчас суда Антаніна распавяла, у якіх умовах яе ўтрымлівалі пасля затрымання: "Я нічога не ела, у мяне не было пасцельнай бялізны. Я спала на падлозе, на лаўцы, пад лаўкай, пад сталом. Мяне не выводзілі на шпацыр, у мяне не было ручніка, туалетных сродкаў. Таму я сябе дрэнна адчувала і магла проста адключыцца".

 

Палітвязні знаходзяцца па адрасах:

Падтрымаць «Вясну»