Андрэй Аляксандравіч Шункевіч быў затрыманы ў Мінску ў межах крымінальнай справы паводле ч. 1 арт. 130 КК (Распальванне сацыяльнай варожасці), ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх), ч. 1 арт. 368 КК (Абраза Лукашэнкі) і арт. 369 КК (Абраза прадстаўніка ўлады), 

Пасля затрымання знаходзіўся ў ІЧУ на Акрэсціна, пасля быў пераведзены ў СІЗА-1, а на пачатку лютага 2023 г. — у магілёўскую Турму № 4.

У Магілёўскім абласным судзе 10 лютага 2023 г. вынеслі прысуд палітвязню. Хлопца абвінавацілі ва ўдзеле ў Маршы ад 16 жніўня 2020 года і напісанні абразлівых каментароў пра сілавікоў, праўладных актывістаў і Лукашэнку. Суддзя Алена Картавенка асудзіла яго па чатырох артыкулах Крымінальнага кодэкса і прызначыла два з паловай гады калоніі ва ўмовах агульнага рэжыму. Таксама ў мінчука канфіскавалі мабільны тэлефон і сістэмны блок персанальнага камп'ютара як "сродкі здзяйснення злачынстваў". 

Па падліках праваабаронцаў, палітвязень цалкам адбыў тэрмін і выйшаў на волю.

Палітвязня асудзілі на два з паловай гады калоніі за ўдзел у Маршы і каментары пра сілавікоў, праўладных актывістаў, Лукашэнку

Паводле версіі абвінавачвання, Шункевіч 16 жніўня 2020 года ў Мінску "ўзяў актыўны ўдзел у незаконным масавым мерапрыемстве, ініцыяваным экстрэмісцкай арганізацыяй, у працэсе чаго мэтанакіравана выходзіў на праезную частку дарогі і блакаваў шлях транспартным сродкам, аказваў відавочнае непадпарадкаванне законным патрабаванням прадстаўнікоў улады".