Андрэя Юр'евіча Сцепаненку затрымалі 2 лютага 2022 г. за значок з выявай “Пагоні” на заплечніку і не выпусцілі пасля адміністрацыйнага арышту — распачалі крымінальную справу. Андрэя ўзялі пад варту і змясцілі ў СІЗА турмы № 1 Гродна 17 лютага. Затым, 7 красавіка 2022 г., мера стрымання ў дачыненні да яго была змененая на падпіску аб нявыездзе. Аднак 12 красавіка мужчыну ўзялі пад варту ізноў.

14 красавіка 2022 г. Андрэя асудзілі на 1 год і 6 месяцаў калоніі па артыкуле аб абразе прэзідэнта (арт. 368 КК).

21 чэрвеня 2022 г. у Гродзенскім абласным судзе была разгледжаная скарга Андрэя на празмерна строгі характар вынесенага пакарання: судовая калегія пад старшынствам суддзі Андрэя Ліхача вырашыла пакінуць скаргу палітзняволенага без задавальнення, а прысуд — без зменаў.

На пачатку ліпеня Андрэя этапавалі ў бабруйскую ПК № 2. Там яго адразу пазбавілі перадачы, а пасля змяшчалі на тыдзень у ШІЗА. Пасля стала вядома, што палітвязня паўторна змяшчалі ў ШІЗА на 10 сутак за некалькі месяцаў да вызвалення.

23 чэрвеня 2023 г. Андрэй выйшаў на волю, цалкам адбыўшы тэрмін.

"Я беларус і хачу жыць у Беларусі без Лукашэнкі": паўтара года калоніі гарадзенцу за абразу прэзідэнта

У судзе Кастрычніцкага раёна Гродна 14 красавіка вынесены прысуд па крымінальнай справе Андрэя Сцепаненкі, абвінавачанага ў абразе прэзідэнта Беларусі (ч.1 арт. 368 Крымінальнага кодэкса).