Анатоля Барысавіча Пугача затрымалі, калі ён прыехаў у Беларусь, каб прайсці абследаванне: у яго выявілі анкалагічнае захворванне. Спачатку мужчыну асудзілі на суткі паводле адміністрацыйнага артыкула 19.11 (распаўсюд экстрэмісцкіх матэрыялаў). Але яшчэ да канца тэрміну яму выставілі абвінавачванні паводле ч. 1 арт. 368 Крымінальнага кодэкса за абразу Лукашэнкі і змясцілі пад варту. 

23 студзеня 2023 г. суддзя Паўлоўская адмовілася змяніць меру стрымання хаця б на хатні арышт і пакінула Анатоля ў СІЗА-6.

Суд Баранавіцкага раёна і г. Баранавічы 21 лютага 2023 г. разгледзеў справу палітзняволенага. Суддзя Аксана Літвінчык прызначыла Анатолю Пугачу пакаранне ў выглядзе пазбаўлення волі на тэрмін адзін год з адбываннем пакарання ў папраўчай калоніі ва ўмовах агульнага рэжыму.

Разгляд апеляцыйнай скаргі на прысуд адбыўся 17 сакавіка 2023 г. у Вярхоўным судзе.

З пачатку траўня 2023 г. палітвязень знаходзіцца ў ПК № 1.

Анатоль выйшаў на волю 23 кастрычніка 2023 г. 

У Баранавічах асудзілі анкахворага, які вярнуўся ў Беларусь на абследаванне

Згодна з матэрыяламі абвінавачання, палітзняволены ў перыяд з 25 лютага па 18 сакавіка 2022 года пасля прагляду відэазапісаў, якія змяшчалі абразу Аляксандра Лукашэнкі, размясціў на сваёй старонцы ў сацыяльнай сетцы гэтыя відэазапісы, тым самым прынізіў гонар і годнасць Лукашэнкі. У якасці змякчальных віну абставін суд прызнаў чыстасардэчнае раскаянне ў зробленым.