Аляксандра Маратаўна Рыбчык — мэнэджарка лагістычнай кампаніі "Trans Solutions". Спярша ёй прызначылі 14 сутак адміністратыўнага арышту, а пасля дзяўчыну перазатрымалі паводле крымінальнай справы.

Нагодай затрымання сталі яе фатаграфіі ў Tinder, дзе яна падчас аднаго з пратэсных маршаў 2020 года стаіць на дарозе з бел-чырвона-белым сцягам. Публікацыя пра затрыманне з'явілася ў адным з праўладных тэлеграм-каналаў.  У "пакаяльным" відэа яна пацвярджае свой удзел у пратэстах. Спачатку яна была змешчана ў ІЧУ, потым супраць яе распачалі крымінальную справу паводле арт. 342 Крымінальнага кодэксу (Актыўны ўдзел у групавых дзеяннях, якія груба парушаюць грамадскі парадак).

4 лютага 2023 г. у судзе Партызанскага раёна Мінска вынеслі прысуд па справе Аляксандры. Паводле інфармацыі праваабаронцаў, суддзя Аляксандр Супічэнка прызначыў палітзняволенай два з паловай гады пазбаўлення волі ў калоніі ва ўмовах агульнага рэжыму.

Разгляд апеляцыйнай скаргі на прысуд прызначаны на 21 красавіка 2023 г. у Мінскім гарадскім судзе.