Аляксандр Рыгоравіч Велясніцкі — былы афіцэр, старшы лейтэнант запасу, пасля выбараў-2020 асудзіў гвалт з боку сілавікоў. Згодна з указам А. Лукашэнкі ад 19 верасня 2022 г. быў пазбаўлены звання. 

Аляксандр быў затрыманы ў Століне 29 верасня 2021 года па крымінальнай справе, узбуджанай за каментары ў інтэрнэце пасля гібелі ў мінскай кватэры супрацоўніка КДБ Дзмітрыя Федасюка і it-спецыяліста Андрэя Зельцэра. 

23 лістапада 2021 года стала вядома, што для Аляксандра ўзялі першую перадачу з лекамі, сродкамі гігіены і адзежай, а таксама дапусцілі да яго адваката. Да гэтага ён знаходзіўся ў Жодзіне, дзе быў гэтага ўсяго пазбаўлены "праз карантын".

14 снежня 2021 г. у дом да Велясніцкіх прыйшлі сілавікі, далі азнаёміцца жонцы Аляксандра з пастановай і сказалі выдаць медаль мужа за бездакорную службу і пасведчанне на ўзнагароду.

26 верасня 2022 г. Брэсцкі абласны суд прызнаў палітзняволенага вінаватым паводле арт. 130 КК (Распальванне варожасці) і прысудзіў яму два з паловай гады зняволення ў папраўчай калоніі з адбываннем пакарання ва ўмовах агульнага рэжыму.

На пачатку лістапада Аляксандра перавялі з СІЗА-7 у баранавіцкі СІЗА-6.

У студзені 2023 г. палітвязня этапавалі ў ПК № 15.

22 жніўня 2023 г. палітвязень выйшаў на волю, цалкам адбыўшы тэрмін.

Жонка палітвязня Аляксандра Велясніцкага: "Падтрымлівае вера ў тое, што муж вернецца дадому"

Жонка Аляксандра Аксана распавяла "Вясне" пра яго сумесныя заняткі з сынам, захапленне рыбалкай і тое, чаму яна ганарыцца сваім мужам. Аксана пачынае размову пра мужа з апісання яго характару: "Ён вельмі добры, справядлівы добры і вясёлы. Мой муж сумленны і неканфліктны чалавек".

Палітзняволенаму Аляксандру Велясніцкаму прысудзілі 2,5 года калоніі па "справе Зельцэра"

Падчас судоў Велясніцкі адмовіўся ад ранейшых паказанняў, паведаміў пра збіццё і пагрозы ў свой бок, а таксама выказаў здагадку, што хтосьці яго падставіў.

Палітвязень Аляксандр Велясніцкі, якога Лукашэнка пазбавіў ваеннага звання, распавёў пра катаванні пасля затрымання па "справе Зельцэра"

У першы дзень суда Аляксандр заявіў, што адмаўляецца ад паказанняў, якія даваў падчас следства і знаходжання ў жодзінскай турме. Прычынай ён назваў тое, што пры затрыманні і ў турме на яго аказваўся ціск. Так, у дзень затрымання, з яго словаў, 29 верасня 2021 года, пінскія супрацоўнікі КДБ пагражалі прастрэліць яму ногі. У Мінску на Акрэсціна ён 3 дні не мог спаць, камера была душнай і перапоўненай людзьмі. Затым, калі Аляксандра даставілі ў Жодзіна, 4 кастрычніка 2021 года, супрацоўнікі турмы сталі ў шэраг, пачалі збіваць і нацкоўваць сабак.

Да палітвязня Аляксандра Велясніцкага дапусцілі адваката, дазволілі перадачы

У Жодзіне больш за месяц яму не дазвалялі наведванне адваката, перадачы і атаваркі, спасылаючыся на карантын.