Аляксандр Фёдаравіч Патапаў жыве ў в. Хатоля Віцебскай вобласці, паходзіць з Украіны. Быў затрыманы напрыканцы жніўня 2022 года ў межах крымінальнай справы за абразу Лукашэнкі ў каментарах у "Аднакласніках" (ч. 1 арт. 368 Крымінальнага кодэксу). Вядома, што да гэтага Аляксандра ўжо затрымлівалі паводле адміністратыўнай справы, тады яму прызначылі штраф.

Згодна з наяўнай інфармацыяй, падчас ракетнага абстрэлу Кіева загінула пляменніца Аляксандра, а ейная трохгадовая дачка была сур'ёзна параненая. Пасля гэтага, знаходзячыся пад уплывам эмоцый, 8 і 16 ліпеня 2022 года Аляксандр размясціў у сацыяльнай сетцы два каментары, якія экспертыза палічыла "абразлівымі".

Разгляд справы пачаўся 10 лістапада 2022 г. у судзе Віцебскага раёна. На адным з пасяджэнняў Аляксандр заявіў, што ў яго пастаянна дрэннае самаадчуванне, цяжкасць у галаве, слабасць і ён вымушаны прымаць абязбольвальныя сродкі. Аднак медык СІЗА, якога выклікалі ў суд, паведаміў, што мужчыну аказваецца належная медыцынская дапамога, змяшчэнне ў стацыянар не патрабуецца. У выніку суддзя Наталля Траццякова 16 лістапада 2022 г. прызнала Аляксандра Патапава вінаватым і прызначыла яму пакаранне ў выглядзе пазбаўлення волі тэрмінам на два гады ва ўмовах агульнага рэжыму.

У снежні Аляксандра этапавалі з СІЗА-2 у ПК № 15.

Выйшаў на волю напрыканцы вясны 2024 г. 

31 кастрычніка 2024 г. Аляксандра будуць зноў судзіць — у судзе Віцебскага раёна. Цяпер мужчыну абвінавачваюць у "распаўсюдзе экстрэмісцкіх матэрыялаў" (ч. 2 арт. 19.11 КаАП). Справу разглядае Міхаіл Зубеня.

Прозвішча Аляксандра зноў з'явілася ў раскладзе суда Віцебскага раёну — 12 снежня яго справу за "распаўсюд экстрэмізму" будзе разглядаць Таццяна Лабацкая.

"Я баюся за сваё жыццё", — заявіў суду асуджаны на два гады калоніі Аляксандр Патапаў

Суд абвясціў перапынак і запрасіў даведку аб стане здароўя абвінавачанага. Медык СІЗА № 2, якога выклікалі ў суд, паведаміў, што Аляксандру аказваецца належная медыцынская дапамога, змяшчэнне ў стацыянар не патрабуецца.

Суддзя забараніла палітвязню выкарыстоўваць у апошнім слове ўкраінскія словы, хаця яны былі ідэнтычнымі беларускім

Сваё апошняе слова, хвалюючыся, Аляксандр Патапаў пачаў на рускай мове, перамешваючы яе з беларускімі і ўкраінскімі словамі.