Аляксандр Андрэевіч Аграйцовіч — жыхар Мінска, прадпрымальнік, удзельнічаў у назіранні за выбарамі, асуджаны паводле арт. 188 Крымінальнага кодэксу (паклёп).

Аляксандра Аграйцовіча абвінавацілі ў тым, што ён узвёў паклёп на прадстаўнікоў выбарчай камісіі падчас выбараў у Палату прадстаўнікоў у 2019 годзе — 12 супрацоўніц школы №187 г. Мінска. А менавіта — апублікаваў на сваім youtube-канале "Дзённікі назіральніка" у траўні 2020 года загадзя ілжывыя звесткі пра чальцоў выбарчай камісіі, якія знеслаўляюць іх гонар і годнасць. У відэа Аграйцовіч адзначыў, што яны з'яўляюцца фальсіфікатарамі выбараў і ў перыяд датэрміновага галасавання здзейснілі падробку дакументаў. Гэтым ён давёў інфармацыю да неабмежаванага кола асобаў. Відэа праглядзелі больш за пяць тысяч разоў.

Абвінавачаны не прызнаў віну: ён упэўнены, што вынікі выбараў былі сфальсіфіцыраваныя. 

Суд Заводскага раёна асудзіў Аляксандра Аграйцовіча да двух гадоў абмежавання волі з накіраваннем у папраўчую ўстанову — "хіміі".

26 траўня 2023 г. палітзняволены паведаміў, што выйшаў на волю па амністыі з ПУАТ № 43.

Мінск: назіральніка судзяць за паклёп на чальцоў выбарчай камісіі

Суд Заводзскага раёна пачаў разглядаць справу ў дачыненні да 36-гадовага прадпрымальніка Аляксандра Аграйцовіча. Яго абвінавацілі па артыкуле 188 Крымінальнага кодэкса. Справу разглядае суддзя Дмітрый Астапенка. Дзяржабвінавачанне прадстаўляе Зубік.

Два гады "хіміі": у Мінску асудзілі назіральніка Аляксандра Аграйцовіча

Суд Заводзскага раёна асудзіў 36-гадовага прадпрымальніка Аляксандра Аграйцовіча да двух гадоў абмежавання волі з накіраваннем у папраўчую ўстанову — "хіміі". Абвінавачанне запрошвала тэрмін удвая менш. Назіральніка прызналі вінаватым па артыкуле 188 Крымінальнага кодэкса. Справу разгледзеў суддзя Дмітрый Астапенка. Дзяржабвінавачанне прадстаўляў Зубік.