Аляксандр Кабанаў

аўтар YouTube-канала "Народны рэпарцёр", прэс-сакратар ініцыятыўнай групы Святланы Ціханоўскай

Дата нараджэння: 30 ліпеня 1971

Дата затрымання: 15 чэрвеня 2020

Прад'яўленыя абвінавачванні:

арт. 342 Крымінальнага кодэкса — Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх
арт. 369 Крымінальнага кодэкса — Абраза прадстаўніка ўлады

Вынік суда: 3 гады

Від пакарання: пазбаўленне волі ў турме ва ўмовах строгага рэжыму

Дата вызвалення: 17 снежня 2022

Суддзя: Краўчанка Вольга

Пракурор: Амосава Таццяна

Сімвалічны/ая хросны/ая: Франк Швабэ, прадстаўнік парламенцкай групы СДПГ па правах чалавека і гуманітарнай дапамозе

Фота: Белсат

Аляксандр Аляксандравіч Кабанаў — брэсцкі блогер, аўтар youtube-канала "Народны рэпарцёр", прэс-сакратар ініцыятыўнай групы Святланы Ціханоўскай.

Быў затрыманы 15 чэрвеня 2020 года, калі пайшоў па выкліку ў паліклініку для кантролю па адбыцці каранціна, і дастаўлены ў ІЧУ Ленінскага раёна г. Брэста. Суд пакараў блогера арыштам у 15 сутак. Аднак 20 чэрвеня блогер знік з ІЧУ. Ягоны лёс стаў вядомы праваабаронцам толькі 25 чэрвеня, калі ў бацькоў Аляксандра Кабанава адбыўся ператрус, а сам блогер быў пераведзены ў Мінскае СІЗА-1. 

Аляксандр Кабанаў знаходзіцца ў статусе падазраванага па крымінальнай справе, узбуджанай паводле ч. 1 арт. 342 Крымінальнага кодэкса і звязанай з падзеямі ў Гродне 29 траўня.

На пачатку 2021 года Аляксандр Кабанаў паведаміў, што яго і Сяргея Пятрухіна пераводзяць у СІЗА ў Брэст, бо дасудовае следства скончылася, справа рыхтуецца да перадачы ў суд.

Кастрычніцкі суд Магілёва 14 красавіка 2021 года вынес прысуд па крымінальнай справе супраць палітзняволеных берасцейскіх блогераў Сяргея Пятрухіна і Аляксандра Кабанава. Суддзя Вольга Краўчанка прызнала іх вінаватымі ў арганізацыі групавых дзеянняў, якія груба парушылі грамадскі парадак (ч. 1 арт. 342 Крымінальнага кодэксу) і знявазе прадстаўніка ўлады ў сувязі з выкананнем ім службовых абавязкаў (арт. 369 КК). Пятрухін таксама прызнаны вінаватым у абразе суддзі Брэсцкага абласнога суду Андрэя Лешчанкі (арт. 391 КК). Абодва блогеры пакараныя трыма гадамі зняволення ў калоніі агульнага рэжыму. Акрамя гэтага, Пятрухін і Кабанаў мусяць выплаціць па 750 рублёў кампенсацыі маральнай шкоды супрацоўніку магілёўскага АМАП Віталю Аўтушэнку, якога, паводле прысуду, зняважыла публікацыя блогераў у сацыяльных сетках.

Напрыканцы кастрычніка 2021 года стала вядома, што Аляксандра пакаралі шасцю месяцамі ПКТ за "сістэматычныя парушэнні правілаў утрымання". У гэты перыяд яму забаронена атрымоўваць пасылкі, мець тэлефанаванні і спатканні з роднымі. 

14 снежня 2021, паводле рашэння суда, Аляксандру змянілі рэжым адбывання пакарання на строгі турэмны і 21 снежня 2021 перавялі з наваполацкай ПК-1 у магілёўскую Турму № 4.

Палітвязень цалкам адбыў тэрмін і 17 снежня 2022 г. выйшаў на волю. За кратамі ў Аляксандра сур'ёзна пагоршылася здароўе.

Пасля вызвалення Аляксандр пакінуў Беларусь.

У сакавіку 2023 г. стала вядома, што супраць Аляксандра Кабанава распачалі яшчэ шэраг крымінальных спраў.

"У ШІЗА парэзаў вены на руках, наклалі 68 швоў". Паразмаўлялі з прэс-сакратаром ініцыятыўнай групы Ціханоўскай пасля выхаду з турмы

"Зеркало" паразмаўляла з Аляксандрам Кабанавым пра жыццё ў калоніі, Віктара Бабарыку і першыя крокі Святланы Ціханоўскай у палітыцы.

"Рэалізоўвалі планы арганізацыі пратэставага руху": блогераў Пятрухіна і Кабанава асудзілі на тры гады калоніі

Кастрычніцкі суд Магілёва 14 красавіка вынес прысуд па крымінальнай справе супраць палітзняволеных берасцейскіх блогераў Сяргея Пятрухіна і Аляксандра Кабанава.

 «Хоць расстрэльвайце — я тут стаяць не буду». Блогераў Кабанава і Пятрухіна выдалілі з суда над імі

11 лютага пачаўся суд над брэсцкімі блогерамі Сяргеем Пятрухіным і Аляксандрам Кабанавым. Але іх судзяць не ў Брэсце і нават не ў Брэсцкай вобласці. Справу разглядае суд Кастрычніцкага раёна Магілёва. Рэпартаж с закрытага пасяджэння зрабіла "Наша Ніва".

Блогеры Сяргей Пятрухін, Аляксандр Кабанаў і Ігар Лосік – на Валадарцы

Храналогія пераследу брэсцкіх блогераў.

Палітвязні знаходзяцца па адрасах:

Падтрымаць «Вясну»