16 студзеня 2023 года суддзя суда Кастрычніцкага раёна Магілёва Наталля Ясенка прызнала вінаватай мясцовую жыхарку Аксану Анатольеўну Юр'еву ў абразе Аляксандра Лукашэнкі (арт. 368 КК РБ).

Паводле матэрыялаў справы, «знаходзячыся па месцы жыхарства, 46-гадовая абвінавачаная з выкарыстаннем свайго мабільнага тэлефона і ўліковага запісу ў сацыяльнай сетцы Facebook размясціла ў свабодным доступе ў сетцы Інтэрнэт матэрыял з выявай Лукашэнкі. У ім яна, нецэнзурна кажучы, давала відавочна негатыўную адзнаку асобы прэзідэнта, чым прынізіла ягоны гонар і годнасць». Юр'ева сваю віну прызнала.

Ёй прысудзілі 1,5 гады зняволення ў калоніі агульнага рэжыму.

Вядома, што Аксану Юр'еву затрымалі ў кастрычніку 2022 года. Тады супрацоўнікі 11-га ўпраўлення ГУБАЗіК (Магілёў) прымусілі яе расказваць на камеру, што з пачатку вайны падтрымлівала Украіну і актыўна пісала каментары на гэтую тэму. У адным з іх яна нібыта абразіла Лукашэнку. Пасля затрымання сілавікі «захапілі» акаўнты жанчыны ў сацсетках: паставілі на «аватарку» дзяржаўны сцяг, а ў статус — «За Беларусь».

Была ўнесеная ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

Па падліках праваабаронцаў мусіла выйсці на волю ў пачатку 2024 г.